ინფექციონისტები მოსახლეობას ცხოველის მიერ კბენის, გაკაწვრის ან დადორბლის შემთხვევაში აცრის ჩატარებას ურჩევენ.

ინფექციური პათოლოგიის, შიდსისა და კლინიკური იმუნოლოგიის ცენტრის ექიმ-ინფექციონისტი მანანა ღლონტი, ცხოველების მიერ ადამიანების კბენის, გაკაწვრის ან დადორბლის შემთხვევებში, აცრის აუცილებლობაზე საუბრობს.

ექიმ-ინფექციონისტი მოსახლეობას მოუწოდებს, ცხოველების, მათ შორის, ძაღლებისა და კატების მიერ კბენის, გაკაწვრის ან დადორბლის დროს შესაბამისი ანტირაბიული აცრა ჩაიტარონ.

ექიმი განმარტავს, რომ ადამიანის ცოფით დაინფიცირება შესაძლოა, ოჯახის ძაღლისგანაც კი მოხდეს, განსაკუთრებით სოფლებში.

ინფექციურ საავადმყოფოში გუშინ 6 წლის ბიჭი ცოფის ვირუსით გარდაიცვალა. გარდაცვლილი ბავშვი, ერთი თვის წინ უსახლკარო ძაღლმა თვალის არეში დადორბლა. მცირეწლოვანი რამდენიმე დღის განმავლობაში ქუთაისის ინფექციურ საავადმყოფოში მკურნალობდა, თუმცა მედიკოსების გადაწყვეტილებით, ის თბილისის საავადმყოფოში გუშინ გადმოიყვანეს. ექიმებმა მისი გადარჩენა ვერ შეძლეს.

განსაკუთრებით საყურადღებოა თავის არე. 6 წლის გარდაცვლილი ბიჭის შემთხვევაში, ინფიცირება თვალის ლორწოვანი გარსიდან მოხდა.

ცხოველთა უფლებების დამცველები ქუთაისის მერიას მოუწოდებენ, დროულად მოხდეს თანამედროვე სტანდარტებით ძაღლსაშენის მოწყობა, რათა მსგავსი შემთხვევები აცილებული იქნას.


სპეციალურად zooclub.ge-სთვის
ნატალია დადიანი