ფაქტები
ძაღლის ენა, ჩვეულებრივ, ვარდისფერია, მაგრამ დღეისთვის ცნობილ ძაღლის 400 ჯიშში არსებობს ორი მნიშვნელოვანი გამონაკლისი: შარ-პეი და ჩაუ-ჩაუ, რომელთაც აქვთ მუქი ლურჯი ენა. ორივე ჩინური ჯიშია.
ძაღლები ენით ილოკავენ ბეწვს პირის გარშემო და ამგვარად იცილებენ ბალანზე დარჩენილ საკვების ნამცეცებს (ამაში შეიძლება დაეხმარონ სხვა ძაღლებიც). ისინი ლოკვით ბეწვსაც ისუფთავებენ მთელ ტანზე _
ძაღლებს ტანზე არა აქვთ საოფლე ჯირკვლები – ისინი თავმოყრილია ფეხის თითებს შორის და ფეხისგულებზე. ტემპერატურის რეგულაციას კი ენის ზედაპირიდან ნერწყვის სითხის აორთქლებით აღწევენ.
როდესაც ძაღლი წყალს სვამს, მისი კუნთოვანი ენა ციცხვის ფორმას იღებს წყლის ამოსაღებად. იგი ასევე ეხმარება საკვების გადაყლაპვაში, რაც განსაკუთრებით მნიშვნელოვანია, თუ გაითვალისწინებთ, რომ ძაღლები საკვებს მთლიანად ყლაპავენ და ლუკმა-ლუკმა არ ღეჭავენ.
პოტენციური საფრთხე
ენას აქვს სისხლძარღვების ფართო ქსელი, ასე რომ, ნებისმიერმა ჭრილობამ შეიძლება ძლიერი სისხლდენა გამოიწვიოს. ძალზე საშიშია გახსნილი კონსერვის ქილა, განსაკუთრებით სახურავი _ თუ ძაღლმა მისი ლოკვა დაიწყო, ადვილად გაიჭრის ენას.
ძლიერი და მოქნილი
ძაღლს შეუძლია ძლიერი და მოქნილი კუნთოვანი ენა პირიდან გამოყოს, ტუჩების ირგვლივ მოატაროს და ცხვირსაც კი მისწვდეს, როგორც ამ სურათზეა ნაჩვენები.
ლეკვის მოვლა
დედები ახალდაბადებულ ლეკვებს, მას შემდეგ, რაც დედის რძით გაძღებიან, საკმაოდ ენერგიულად ლოკავენ ენით და ამით ეხმარებიან დეფეკაციასა და მოშარდვაში, სანამ ისინი საჭმლის მომნელებელი და გამომყოფი სისტემის სრულად მართვას შეძლებენ.
ლოკვა ჯანმრთელობის ნიშანია
ძაღლები სხეულის გაღიზიანებულ ადგილებს ენას უსვამენ. თუ მათ უეცრად დაიწყეს თათების ხშირი ლოკვა გვიან ზაფხულში, სოფლის მიდამოებში სეირნობის შემდეგ – ეს სისხლისმწოველი ტკიპის ლარვული ფორმით დასნებოვნების კლასიკური ნიშანია.
ძაღლები ასევე ილოკავენ ნებისმიერ ჭრილობას სისხლდენის შესაჩერებლად და ინფექციისგან დასაცავად. გამუდმებული ლოკვის შედეგად ფეხის ქვედა ნაწილზე ზოგჯერ ჩნდება უბალნო უბანი, რომელსაც `ლოკვითი გრანულომა~ ეწოდება. ეს ხშირად ფსიქოლოგიური დარღვევის ნიშანია და განსაკუთრებით ახასიათებთ დიდ ძაღლებს, რომლებსაც რეგულარულად მარტო ტოვებენ ხანგრძლივი პერიოდის განმავლობაში.
იყავით დაკვირვებული
სხეულის რომელიმე ადგილის ხშირი, გამუდმებული ლოკვა დაავადების მიმანიშნებელია. ეს ბოქსიორი ერთთავად ილოკავს თათს, რისი მიზეზიც, შესაძლოა, ტკიპებით დასნებოვნება იყოს.
ლოკვის სხვა მიზეზები
როდესაც ძაღლი ტუჩებს ულოკავს სხვა ძაღლს, ეს მისდამი მორჩილების ნიშანია. ეს ქმედება თავს იჩენს ჯერ კიდევ ადრეულ ასაკში, როდესაც ლეკვი დედას ულოკავს პირს იმ იმედით, რომ ის საკვებს გადმოანთხევს მისთვის, შესაძლოა ამიტომაც ცდილობს ძაღლი პატრონის სახის ალოკვას. და კიდევ, ახალგაზრდა ძაღლებს მოსწონთ საგნების ლოკვა – უფრო ცნობისმოყვარეობის გამო, თუ რისგან არის დამზადებული.
სახის ლოკვა
ძაღლები, რომლებიც ერთმანეთს კარგად იცნობენ, შეხვედრისას ხშირად ურთიერთს სუნავენ, შემდეგ სახეს ულოკავენ. მათ, განსაკუთრებით ახალგაზრდა ინდივიდებს, უნდათ, რომ პატრონებსაც ამგვარად მიესალმონ. ამიტომაც, როდესაც დაიხრებით ან დაჯდებით, ძაღლი შეიძლება შემოგახტეთ და სახის ლოკვა დაგიწყოთ. ეს მეგობრული მისალმებაა, მაგრამ ნამდვილად არ არის მოსაწონი ჰიგიენის თვალსაზრისით. თუ ძაღლი საყელურს ატარებს, გაცილებით იოლი იქნება მისი შეჩერება, რადგან მის მართვას ადვილად შეძლებთ. სხვა შემთხვევაში უბრალოდ ნელა უნდა მოიშოროთ, რისთვისაც უბრძანეთ _ დაჯდეს.
რჩევა
სხეულის რომელიმე ნაწილის გამუდმებული ლოკვა შეიძლება უკავშირდებოდეს ფარისებრი ჯირკვლის უკმარისობას. თუ ეჭვი გაქვთ, ძაღლი გაასინჯეთ ვეტერინარს.
მასალა მომზადებულია "პალიტრა L"-ის მიერ გამოცემული წიგნის "რაზე მეტყველებს ძაღლის ქცევა" მიხედვით