სოციალურ ქსელში გავრცელებულ მასალას საზოგადოების მხრიდან დიდი გამოხმაურება მოჰყვა. ZooClub.ge ფოტოების ავტორებს დაუკავშირდა და გაარკვია, როდის და რა ვითარებაში გადაიღეს მათ ცხოველთა თავშესაფარი:
ზაირა ნადირაშვილი:
“24 ივლისს სრულიად შემთხვევით აღმოვჩნდი ცხოველთა თავშესაფარში, იპოდრომზე ცხენებზე საჯირითოდ ვიყავით მე და ჩემი შვილები, შემდეგ გავისეირნეთ და გადავწყვიტე, იქვე არსებულ ცხოველთა თავშესაფარში ბავშვებს ვაჩვენებდი კნუტებსა და ლეკვებს. ვერ წარმომედგინა, რომ ეს სურათი დამხვდებოდა. კატასტროფული მდგომარეობა იყო.
რაულ ხალვაში:
“სპეციალურად მივედით მესამე დღეს, დაგვაინტერესა ამჯერად რა სურათი დაგვხვდებოდა, მაგრამ არანაირი ცვლილება არ ყოფილა. მკვდარი კნუტები და ლეკვები იყვნენ იმ გალიებში, სადაც ცოცხალი ცხოველებიც ცხოვრობდნენ. საკვები არ ჰონდათ, არც წყალი, მოუვლელი და საშინელი მდგომარეობა იყო. რადგანაც რეაგირება არ იყო, გადავწყვიტეთ, სოციალური ქსელით გაგვევრცელებინა ინფორმაცია. გუშინ ავტვირთეთ ფოტოები და დღეს უკვე ყველა მედია საშუალება გვირეკავს. უბრალო მოქალაქეები ვართ, რომლებსაც გვიყვარს ცხოველები და ამ ფორმით ჩვენი მოქალაქეობრივი ვალი მოვიხადეთ“, - აღნიშნა რაულ ხალვაშმა.
„სევერის“ მთავარი ექიმი ეკატერინე კუპატოვა არ უარყოფს, რომ თავშესაფარში ცხოველების გარდაცვალება ფიქსირდება. განმარტავს, რომ თავშესაფარში ძირითადად ქუჩიდან აყვანილი ძაღლები ხვდებიან და მათი ჯანმრთელობის მდგომარეობაც ხშირ შემთხვევაში გართულებულია:
”ჩვენთან ცხოველი შემოდის ქუჩიდან, საკანალიზაციო ჭებიდან და სარდაფიდან ამოყვანილი. რა თქმა უნდა, არის შემთხვევები, როცა გაუბედურებულ მდგომარეობაში მყოფი ცხოველები კვდებიან. არის სიტუაციები, როცა უხეშად არ მინდა ვთქვა, მაგრამ ვაძინებთ, ან გადასხმებს ვუკეთებთ და ვმკურნალობთ. გააჩნია ცხოველის ჯანმრთელობის მდგომარეობას. აქ ნახეს პროვოკაციული სიტუაცია, რასაც ნებისმიერი შეიძლება შეესწროს. ფოტოებზე ჩანს, რომ იატაკი გასუფთავებულია, ცხოველები რომ კვდებიან ამას არც უარვყოფთ. ვოლიერები დღეში ორჯერ სუფთავდება და მაქსიმუმ ორი საათი თუ შეიძლება გარდაცვლილი ცხოველი დარჩეს ვოლიერში. ბათუმში ჩამოსულმა რუსმა ბიზნესმენმა როცა ნახა, რომ რთული მდგომარეობა იყო ცხოველების თავშესაფრის არარსებობის გამო, გამოყო თანხა და გააკეთა ეს თავშესაფარი. მერიის მიერ გამოცხადებული ტენდერიც მოვიგეთ და გვაქვს დაფინანსება“, - აღნიშნა ”სევერის” მთავარმა ექიმმა ეკატერინე კუპატოვამ.
ბათუმის მერის მოადგილე ალექსანდრე მითაიშვილი გაკვირვებულია სოციალურ ქსელში გამოქვეყნებული მასალის გამო. მისი განმარტებით, მერიის ზედამხედველობის სამსახური კვირაში ორ-სამჯერ ამოწმებს თავშესაფარს და მათ მიმართ პრეტენზია არ ჰქონიათ:
”მერიის ზედამხედველობის სამსახური კვირაში ორ-სამჯერ ამოწმებს ამ თავშესაფარს. ჯერჯერობით ჩვენ არავითარი პრობლემები არ გვქონია, კომპანია კეთილსინდისიერად ასრულებს მოვალეობას, ყველაფერი არის წესრიგში და დღეს ფოტოების გამოქვეყნების შემდეგ მე თვითონაც შევამოწმე. ამ ფოტომასალის ავთენტიურობა დასადგენია. თავშესაფარი ძირითადად უმკლავდება ქალაქის ფარგლებში არსებული უპატრონო ცხოველების მოვლას“, - აღნიშნა ალექსანდრე მითაიშვილმა.
კომპანია „სევერს“ მერიის 240 000 ლარიანი ტენდერი აქვს მოგებული.
ნინო ხოზრევანიძე - სპეციალურად ZooClub.ge-სთვის
იხილეთ ფოტოგალერეა