სანამ კუს მოვიყვანთ სახლში, აუცილებლად უნდა ვიცოდეთ, როგორ ცხოვრობენ ისინი, რითი იკვებებიან და როგორ მოვლა ჭირდებათ.
უმჯობესია, თავიდან შევიძინოთ ერთი კუ და მხოლოდ შემდეგ მივუყვანოთ მას მეგობრები. ერთდროულად რამდენიმეს შეძენის შემთხვევაში შესაძლებელია, ჩვენ ვერ გავართვათ თავი მათ მოვლას.
თუ აქამდე კუ არ გყოლიათ, უმჯობესია, აირჩიოთ გავრცელებული სახეობები: წითელურა ან შუააზიური კუ.
კუს ყიდვა სასურველია გაზაფხულის ბოლოდან შემოდგონის დასაწყისამდე. ზამთარში შესაძლოა, ყიდდნენ ავადმყოფ კუს. გარდა ამისა, ცხოველი შეიძლება, გზაში გადაყვანისას გაგვიცივდეს.
უნდა ვიცოდეთ, რომ ჯანმრთელი კუ აქტიურია, არ აქვს გამონადენი ცხვირიდან და თვალებიდან. თვალები ღია აქვს, არ სუნთქავს პირით და რეაგირებს ადამიანებზე.
საქართველოში და საერთოდ მსოფლიოში ერთ-ერთ ყველაზე გავრცელებულ კუდ წითელყურა კუ ითვლება. იგი წყლის კუა (trachemys scripta elegant), წარმოშობით ამერიკულია (ფლორიდა, აშშ-ს და სხვა სამხრეთი შტატები). დედალი კუ იზრდება 25-30 სმ, მამალი კუ 20-25 სმ.
კუები ცხოვრობენ 50 წელს, პირობების მიხედვით. წყლის ტემპერატურა აკვატერარიუმში დღის განმავლობაში 24-27 გრადუსის ფარგლებში უნდა იყოს, ხოლო ღამე დასაშვებია მისი 20 გრადუსამდე დაწევა.
კვება არ წარმოადგენს დიდ პრობლემას, საკვების დიდ ნაწილს ხორცეული უნდა შეადგენდეს. აჭმევენ თევზს (როგორც ცოცხალს, ასევე მაღაზიაში ნაყიდს), საქონლის ხორცის არაქონიან ნაწილს, თუმცა, ძუძუმწოვრების ხორცი არც ისეთი იდეალური საკვებია თევზეულისგან განსხვავებით. რაციონის მრავალფეროვნებისათვის აძლევენ თევზის საკვებს (ბურთულების ან ჩხირების სახით), წყალმცენარეებს, რომლებსაც დიდი სიამოვნებით მიირთმევს ყველა კუ, სალათის ფურცლებს და ა.შ. კუს 2 წლამდე უნდა აჭამოთ დღეში ორჯერ დილა-საღამოს, ზრდასრულ კუს კი, 2-3 დღეში ერთხელ.
წყლის კუს დადებითი თვისებები:
ისინი უფრო ლამაზები და აქტიურები არიან, ვიდრე ხმელეთის კუები.
მათი შეძენა ადვილი და იაფია. რაც მთავარია, ეს არ აყენებს ბუნებას ზიანს. წყლის (განსაკუთრებით წითელყურა) კუები უვლიან ერთმანეთს.
zooclub.ge-სთვის ანი ქარჩავა