პირველი ფაქტები
ამ სფეროში გამოკვლევები დაიწყო 1980-იანი წლების დასასრულს, რაც განაპირობა დალმაციელის, სახელად ტრუდის, ქცევამ. იგი ჯიუტად ცდილობდა პატრონის ფეხიდან ხალის მოღრღნას. ეს ადამიანი ექიმთან წავიდა და თავზარდაცემული დარჩა, როდესაც მისი კანის დეფექტი სინამდვილეში ავთვისებიანი მელანომა აღმოჩნდა. ეს შემთხვევა საინფორმაციო საშუალებებით მთელ მსოფლიოში გავრცელდა. მალევე ცნობილი გახდა სხვა
სარძევე ჯირკვლის კიბოს დიაგნოზი
ერთ-ერთი ყველაზე საინტერესო შემთხვევა ეხება ძაღლს, რომელიც ცდილობდა პატრონის გაფრთხილებას მკერდის კიბოს შესახებ და ამისთვის ერთთავად მიიწევდა დაავადებულის უბისკენ. როგორც კი სიმსივნე ამოკვეთეს, ძაღლმა ამგვარ ქცევას თავი დაანება... მაგრამ სამი თვის შემდეგ კვლავ დაიწყო. პატრონის სარძევე ჯირკვლის გამოკვლევებმა აჩვენა, რომ იქ სიმსივნური ქსოვილის მცირე კერა ჯერაც არსებობდა. აშშ-სა და დიდ ბრიტანეთში ჩატარებული დაკვირვებების თანახმად, შესაძლებელია ძაღლების გაწვრთნა სხვადასხვა ტიპის სიმსივნის აღმოსაჩენად. ასევე დადგინდა, რომ ძაღლი ამას სარძევე ჯირკვლის კიბოთი დაავადებული პიროვნების ამონასუნთქი ჰაერის სუნის მიხედვით იგებს.
სხვადასხვა არომატი
უაღრესად განვითარებული ყნოსვის გამო ძაღლებს უამრავი სუნის დადგენა შეუძლიათ. მათ სხვადასხვა სუნი ერთმანეთში არასოდეს ერევათ. ძაღლები სუნს ადამიანებისგან განსხვავებულად აღიქვამენ. თუ სანელებლების ნაზავი ჩვენთვის ერთი მთლიანი არომატია, ძაღლები მასში შემავალი თითოეული კომპონენტის სუნს ცალ-ცალკე ცნობენ. მათი ტვინიც უაღრესად განვითარებულია ყნოსვითი ინფორმაციის მისაღებად და ანალიზისთვის (იხ. გვ. 104).
მარტივი მეთოდი
კლიკერით მუშაობა წვრთნისას ძაღლში მორჩილების განსავითარებლად გამოიყენება. როგორც კი ძაღლი სწორად შეასრულებს ამოცანას, კლიკერის ხმა ესმის და ამით იგებს, რომ კარგად მოიქცა. თანდათანობით ამ ხმაზე დადებითი პირობითი რეფლექსი გამოუმუშავდება.
სათანადო წვრთნა
ზოგჯერ ძაღლებს ყოველგვარი წვრთნის გარეშეც შეუძლიათ შეამჩნიონ ცვლილება პატრონში. დიდი ხანია მეცნიერები გამოცდილ კინოლოგებთან ერთად იკვლევენ ძაღლის გაწვრთნის მეთოდებს ქსოვილის სინჯებში სიმსივნური უჯრედების აღმოსაჩენად. მათ შესანიშნავი შედეგი მიიღეს ქალაქ ტალაჰასიში (ფლორიდა) ჩატარებულ ცდებში, რომლებშიც მონაწილეობდა მიტელშნაუცერი ჯორჯი. ამ ძაღლს, რომელიც მანამდე ასაფეთქებელი საშუალებების აღმოსაჩენად იყო გაწვრთნილი, სულაც არ გასჭირვებია კანის კიბოს მიგნება სუნით და ნიმუშების 99% სწორად ამოიცნო.
სხვადასხვა ტიპის სიმსივნის დადგენა
დიდ ბრიტანეთში ძაღლებს შარდის სუნით შარდის ბუშტის კიბოს დასადგენად წვრთნიან. მართალია, ისეთ მნიშვნელოვან წარმატებას ვერ მიაღწიეს, როგორც ჯორჯის შემთხვევაში, მაგრამ იმაზე უკეთესი შედეგები მიიღეს, ვიდრე სხვა მეთოდების გამოყენებისას. ამ დაავადების ადრეულ სტადიებს ძაღლები უკეთ ადგენდნენ, ვიდრე ექიმები დიაგნოსტიკის აღიარებული მეთოდების, მაგალითად კომპიუტერული ტომოგრაფიის, გამოყენებით. გარდა ამისა, ამონასუნთქი ჰაერის სუნით ძაღლებს შეუძლიათ დაადგინონ არა მხოლოდ სარძევე ჯირკვლის, არამედ ფილტვის კიბოც.
ძაღლები აღარ არის საჭირო
ძაღლებში აღმოჩენილმა სიმსივნის დადგენის უნარმა რევოლუციური გადატრიალება მოახდინა. ახლა მკვლევრებისთვის აშკარაა, რომ ინდივიდის სიმსივნეს თავისი სპეციფიკური სუნი აქვს. სამომავლო კვლევებით გათვალისწინებულია ამ მთავარი ბიომარკერების ბუნების დადგენა და მათ ამოსაცნობად საჭირო ტექნოლოგიის განვითარება.
კიბოს აღმომჩენი კლონები
ამ ლაბრადორ რეტრივერს იაპონიიდან, რომელსაც სიმსივნის დადგენის უნიკალური ნიჭი აღმოაჩნდა, საკვერცხეები ამოცლილი ჰქონდა, მაშასადამე, ლეკვები ვერ ეყოლებოდა. ამიტომ სამხრეთ კორეაში მოახდინეს მისი კლონირება. აღსანიშნავია, რომ მანამდე მიიღეს ნარკოტიკების აღმომჩენი ძაღლების კლონებიც _ მეცნიერები იმედოვნებენ, რომ ამ ლაბრადორის ლეკვებს დედის ნიჭი მემკვიდრეობით გადაეცემათ.
სწავლების პროცესი
სიმსივნის აღმომჩენი ძაღლების გასაწვრთნელად დადგენილი მეთოდები ძალზე ჰგავს ნარკოტიკებისა და ასაფეთქებელი ნივთიერებების სუნით ამოცნობის მეთოდებს. ძაღლებს აქვთ მხოლოდ სპეციფიკური სუნების ამოცნობის უნარი, ამიტომ შარდის ნიმუშის მიხედვით შეუძლიათ შარდის ბუშტის სიმსივნის აღმოჩენა, მაგრამ ვერ ადგენენ, მაგალითად წინამდებარე ჯირკვლის სიმსივნეს.
ფრთხილად!
ძუებს თავადაც ემართებათ სარძევე ჯირკვლის კიბო. თუ ძაღლს სხეულზე რაიმე კვანძებს შენიშნავთ, დაუყოვნებლივ მიმართეთ ვეტერინარს.