მოდარაჯის ინსტინქტი
ძაღლები, რომლებიც მოდარაჯე ჯიშებად გამოიყვანეს, ტერიტორიას უფრო გულმოდგინედ იცავენ და მეტად ამჟღავნებენ მომსვლელების, განსაკუთრებით უცნობების, მიმართ უნდობლობას. კომპანიონი ჯიშები, პირიქით, გაცილებით კეთილგანწყობილნი არიან სტუმრების მიმართ. მნიშვნელოვანია ძაღლების გაწვრთნა – სტუმრებს, აგრესიულად არ შეხვდნენ.
ორმხრივი რეაქცია
უბრალოდ დააკვირდით ძაღლის ქცევას, როდესაც სტუმარი მოვა და ადვილად მიხვდებით, რომ მასზე გავლენას ახდენს სტუმრის რეაქცია.
საფრთხე
თუ ძაღლი ღრენის დროს კბილებს გამოაჩენს, ეს პირდაპირი მუქარის ნიშანია.
აღელვებული ყეფა
სტუმრის მოსვლასთან ერთად ძაღლი, სავარაუდოდ, რამდენჯერმე მოკლედ და ჩქარ-ჩქარა ყეფს, განსაკუთრებით მაშინ, თუ ყურადღებას არ აქცევენ. ის მომსვლელს შესცქერის და მის რეაქციას ელოდება.
ფრთხილად
ძაღლმა მტკივნეული დაკაწვრა იცის. ამიტომ რეგულარულად გაუსინჯეთ ბრჭყალები, რომ ზედმეტად არ გაეზარდოს და ბოლოში წვეტიანი არ გაუხდეს.
გულითადი შეგებება
ძაღლს ადვილად შეუძლია ხშირი სტუმრების დამახსოვრება და მათ სიხარულით ხვდება. ბევრი ძაღლი ცდილობს, მოსულს შეახტეს, რათა მის სახეს ცხვირი მიადოს და დაყნოსოს. ძაღლები ხომ ჩვეულებრივ ასე ესალმებიან ერთმანეთს. ასეთმა გულითადმა შეხვედრამ შესაძლოა, თქვენ გაგამხიარულოთ, მაგრამ სტუმარი შეაშინოს – განსაკუთრებით, თუ დიდი ძაღლი გყავთ, ამიტომ ამგვარ ქცევას არ უნდა მიაჩვიოთ. ძაღლი, სავარაუდოდ, ყეფასაც დაიწყებს, მაგრამ უფრო თამაშის და არა გაფრთხილების მიზნით (თუმცა, სტუმრისთვის ალბათ რთული იქნება ამის განსხვავება!). შეიძლება, რამდენჯერმე შემოურბინოს კიდეც, მერე გაიქცეს და სათამაშოთი დაბრუნდეს იმ იმედით, რომ სტუმარიც ეთამაშება.
ყეფა ტერიტორიის დაცვის დროს
საკუთრების, მათ შორის ტერიტორიის, დაცვის დროს ძაღლები შეიძლება აგრესიულები იყვნენ. ყველაზე აშკარად ეს ჩანს ყეფის მანერაში. თუ უცნობის ყოფნას აღმოაჩენს, შედარებით ხმამაღლა ყეფს და ამით უფრო დიდი ძაღლის შთაბეჭდილებას ტოვებს, ვიდრე სინამდვილეშია. ძაღლის ძირითადი ფუნქციაა – პატრონს შეატყობინოს უცხო ადამიანის ყოფნის შესახებ და ეს ყეფა მისივე ბრძანებით უნდა შეწყვიტოს. დაახლოებით ასე იცავს თავის ტერიტორიას მგლის ხროვაც, რომლის წევრები უცხოს აღმოჩენისთანავე ერთმანეთს აფრთხილებენ მისი შემოჭრის შესახებ. როგორც კი ძაღლი დაუპატიჟებელი სტუმრის ვინაობას დაადგენს, სხვაგვარად იქცევა - თუ კარგი ნაცნობი აღმოჩნდება, ზემოაღწერილი მანერით მიესალმება.
კუდის ქიცინი
ძაღლი მაღლა აწეული კუდის ქიცინით ადვილად გამცნობთ თავის აღტაცებას. ჯიშებს, რომელთაც ასეთი ქცევა ახასიათებთ, პუდელიც მიეკუთვნება.
ყეფა თუ კბენა?
ბევრმა ძაღლმა, მათ შორის ამ ლაბრადორ რეტრივერმაც, იცის ბოხი ხმით, ხშირად შემაშინებლად ყეფა. ეს საკმარისია, რომ მომსვლელების უმრავლესობამ ჭიშკრის გარეთ დაიცადოს, ვიდრე ძაღლს მოუხმობთ და შიგნით შეიყვანთ. იშვიათად ვინმე გაბედავს მასთან შესაძლო დაპირისპირებას. თუმცა ძაღლები მომსვლელებს იშვიათად ესხმიან თავს: თუ მაინც მოხდა და ვინმე გაუფრთხილებლად შემოვიდა – ისინი უბრალოდ გააგრძელებენ ყეფას.
ყურადღების მოლოდინში
ბევრ ძაღლს, მათ შორის პუდელს, საკმაოდ კარგად გამოსდის უკანა ფეხებზე დგომა. ასე ისინი ნაცნობ სტუმრებს ესალმებიან. ეს ყურადღების მიქცევის ხერხია – მათ უნდა დაინახონ, რომ მიტოვებულები არ არიან.
მასალა მომზადებულია "პალიტრა L"-ის მიერ გამოცემული წიგნის "რაზე მეტყველებს ძაღლის ქცევა" მიხედვით