კრიუგერის ნაციონალურ პარკში (სამხრეთ აფრიკის რესპუბლიკა) სპილომ ბრაკონიერი გათელა და სიკვდილამდე მიიყვანა. ამის შესახებ ინფორმაციას ადგილობრივი პოლიცია "თვითერის" საკუთარ გვერდზე ავრცელებს.

მონადირეების ჯგუფი ნაკრძალის ტერიტორიაზე უკანონოდ შეიპარა. ერთ-ერთი მათგანი მარტორქის მოკვლას აპირებდა, როდესაც მას სპილო თავს დაესხა. ცხოველმა, მეგობრების თვალწინ, ბრაკონიერი გათელა. მოწმეებმა ნაკრძალი სასწრაფოდ დატოვეს და მამაკაცის ოჯახს დაუკავშირდნენ.

3 აპრილს ნაკრძალის თანამშრომლები სხეულის საძებნელად ტერიტორიაზე გავიდნენ. მათ გვამის ნარჩენები, მომდევნო დღეს, "ნიანგის ხიდთან" აღმოაჩინეს.

"ადგილზე მხოლოდ ადამიანის ჩონჩხი და მისი შარვალი ვიპოვეთ. სავარაუდოდ, გვამი მშიერი ლომების პრაიდმა იპოვა", - ამბობს ნაკრძალის თანამშრომელი.



ადგილობრივი პოლიციის ინფორმაციით, სამი ბრაკონიერი დაჭერილია. სასამართლოში პირველი მოსმენა 5 აპრილს გაიმართა. მათ ბრალი წარდგენილი აქვთ ნაკრძალის ტერიტორიაზე არაკანონიერად შეღწევისთვის, იარაღის უკანონო ტარებისთვის და არალეგალური ნადირობისთვის. განმეორებითი მოსმენა 12 აპრილს გაიმართება.

წყარო: cnn.com