"გვესმის, რომ ცხოველებთან დამოკიდებულება უნდა იყოს რაც შეიძლება მეტად ადამიანური, თუმცა, ამავდროულად, ჩვენ უნდა დავიცვათ ადამიანების კომფორტი და ეს არ უნდა მოხდეს ერთი მეორეს ხარჯზე", - ამის შესახებ ცხოველთა მონიტორინგის სააგენტოს ახალმა ხელმძღვანელმა, ვახტანგ ლომჯარიამ თბილისის საკრებულოში წარდგენის შემდეგ განაცხადა. ლომჯარიას თქმით, სააგენტო ოპონირების რეჟიმიდან, რომელშიც აქამდე იმყოფებოდა, გადადის თანამშრომლობის რეჟიმში, ამიტომ ის არასამთავრობო სექტორთან და თემით დაინტერესებულ ყველა პირთან შეხვედრებს უახლოეს მომავალში დაიწყებს.

"პირველ რიგში, დიდი მადლობა მინდა გადავუხადო ბატონ კახას ნდობის გამოცხადებისთვის, ჩვენ გააზრებული გვაქვს ის პრობლემები, რომელთა წინაშეც ვდგავართ. სწორედ ჩვენი ხედვა და საქმიანობა იქნება მიმართული სისტემის მეტი სამართლიანობისა და მეტი ჰუმანურობისკენ. ჩვენ გვესმის, რომ ცხოველებთან დამოკიდებულება უნდა იყოს რაც შეიძლება მეტად ადამიანური, თუმცა, ამავდროულად, ჩვენ უნდა დავიცვათ ადამიანების კომფორტი და ეს არ უნდა მოხდეს ერთი მეორეს ხარჯზე. ამავდროულად, მინდა, გავხსნა ჩვენი კარი მაქსიმალურად, როგორც აქტივისტების, ასევე ორგანიზაციებისთვის და გამოვაცხადოთ ღიად თანამშრომლობის, მოლაპარაკებებისა და რეკომენდაციებისთვის მზაობა. ჩვენ ოპონირების რეჟიმიდან, რომელშიც აქამდე იმყოფებოდა სააგენტო, გადავდივართ თანამშრომლობის რეჟიმში და მივესალმებით ყველასთან შეხვედრებს, კონსულტაციებს, რომლებსაც დავიწყებთ უახლოეს დღეებში და ძალიან მალე ვაჩვენებთ იმ შედეგებს, რომლებსაც ვგეგმავთ", - განაცხადა ლომჯარიამ.

მისივე თქმით, იგეგმება სააგენტოს ბიუჯეტის ოპტიმიზაცია. როგორც ლომჯარიამ წარდგენის შემდეგ აღნიშნა, ჯერჯერობით ჩამოყალიბებული არ არის სტრატეგია.
"ცხადია, ძალიან მნიშვნელოვანია ცვლილებები, როგორც თანამშრომელთა ოპტიმიზაციის, ასევე სამსახურის დამოკიდებულების მიმართულებით. პირველ რიგში, ჩვენი უმთავრესი მიმართულება იქნება არასამთავრობო ორგანიზაციებთან და აქტივისტებთან ძალიან მჭიდრო თანამშრომლობა იმ რეალურად არსებული პრობლემების აღმოსაფხვრელად, რომელთა მიმართაც ან თვალის დახუჭვა ხდებოდა, ან ტექნიკურად ვერ ვაგვარებდით. ჩვენი ერთ-ერთი მთავარი ამოცანაა, როგორც ევროპული, ასევე მსოფლიო თანამედროვე სტანდარტებით სისტემის გამართვა, სწორედ იმ სტანდარტებით, რომლებიც ევროპის თანამედროვე განვითარებულ ქვეყნებშია აპრობირებული", - განაცხადა ლომჯარიამ.