მომხდარის დეტალები მატილდას ოჯახის ახლობელმა - თამარ საგინაშვილმა გაგვაცნო: ახალგაზრდის აღშფოთება ქალბატონის მიერ საკუთარი ძაღლის მიმართ მზრუნველობამ გამოიწვია. სიტყვიერი შეურაცხყოფა მალევე გადაიზარდა ფიზიკურში. ჩხუბს ბევრი თვითმხილველიც ჰყავდა, თუმცა, ქალბატონის დაცვა 11 წლის ვაჟის გარდა არავის უცდია.
პოლიციაც თავად მატილდას გამოუძახებია. აგრესორი ადგილიდან მიიმალა, თუმცა, მისი ვინაობა ცნობილია.
მატილდა მირზოევი პოლიციისა და ექიმების მხრიდან ზეწოლისა და არასათანადო მოპყრობის ფატქებს აღნიშნავს. მას რაიმე სამედიცინო კვლევა აქამდე არ ჩატარებია, მიუხედავად იმისა, რომ მძიმე მდგომარეობაშია. ამჟამად ქალბატონი ძლიერი თავის ტკივილის, პირღებინებისა და ზოგადი სისუსტის ჩივილებით სასწრაფომ წნორის საავადმყოფოში გადაიყვანა, სადაც მკურნალობის ხარჯების 50%-ის დაფარვა თავადვე უწევს.
ამ ფაქტმა აღშფოთება გამოიწვია ცხოველთა მოყვარულ საზოგადოებაში, სადაც მატილდა თავისი კეთილი საქმეებით არის განთქმული.
„მომხდარი შედეგია იმ დაუსჯელობის სინდრომისა, რომელიც ზოგადად ქვეყანაში, განსაკუთრებით კი ცხოველთა დაცვის კუთხით, მძვინვარებს“, - აცხადებენ ისინი.
ქალბატონის ფიზიკური დაზიანების ფაქტთან დაკავშირებით პოლიციამ ეჭვმიტანილი გ.ნ. დაკითხა.
ZooClub.ge მოვლენების განვითარებას აუცილებლად მიადევნებს თვალს და მკითხველს ოპერატიულად მიეწოდება სიახლეები.
ნატალია სლეპაკოვა სპეციალურად ZooClub.ge-სთვის