უსაფრთხოების ზომები
ძაღლები ინსტინქტურად ცნობისმოყვარენი არიან, განსაკუთრებით უცნობ გარემოში ყოფნისას, და ამის გამო შეიძლება თავი საფრთხეში ჩაიგდონ. ყოველთვის ახლოს გყავდეთ, თუ საჭიროა _ დაუძახეთ, მოიყვანეთ, საბელი გაუკეთეთ და ისევ გაუშვით. ლეკვები ვერ ხვდებიან, რა საფრთხე ემუქრებათ ჩქარ მდინარესთან ძალზე ახლოს მისვლით, ან კლდის თავზე
სოფლის მოყვარულები
ზოგიერთი ჯიში უკეთ არის შეგუებული სოფლის გარემოს და იქ ცხოვრება ურჩევნია. ამერიკული კუნჰაუნდები თავს კარგად გრძნობენ ისეთ ადგილებში, სადაც თავისუფლად სირბილი შეუძლიათ. ძაღლის შერჩევისას მნიშვნელოვანია, გაითვალისწინოთ, რომელ გარემოში უნდა აცხოვროთ.
ეკლებიანი დაცვა
ძაღლებს აინტერესებთ ზანტი ცხოველები, მაგალითად კუ და მაჩვზღარბა, მაგრამ ვერ ეკარებიან, რადგან მათ სხეულს ბუნებრივი ეკლებიანი ჯავშანი იცავს. მაჩვზღარბებს უნდა ერიდონ ძაღლის პატრონებიც, რადგან მათი ნაჩხვლეტი ძალზე მტკივნეულია.
ფრთხილი დათვალიერება
როდესაც ძაღლი გადაეყრება მისთვის უცნობ ცხოველს ან საგანს, ინსტინქტურად უკან დაიხევს, კისერს წაიგრძელებს და ფრთხილად დაყნოსავს. ამ პოზაში ადვილად შეუძლია სწრაფად მოკურცხლოს; თუ შეეშინდა, უკანა ფეხებს დაეყრდნოს და უკან დაიხიოს, თან ამ დროს თვალი არ მოაშოროს უცნობ არსებას. თუ პირველი დათვალიერებისას არ შეშინდა, წინა თათებს წასწევს და მიუახლოვდება; ზოგჯერ შეეცდება, თათი წაჰკრას, რაც შხამიან გველთან ძვირად დაუჯდება _ ცხვირზე მისი ნაკბენი გაცილებით მძიმეა, ვიდრე ფეხზე, რადგან შხამი პირველ შემთხვევაში უფრო სწრაფად მოქმედებს.
ფრინველის დევნა
ძაღლებს მიწაზე მობუდარი ფრინველების დაფრთხობა და წამოგდება შეუძლიათ, ამიტომ მინდვრებში, სადაც, სავარაუდოდ, ფრინველები ბუდობენ, ძაღლი მხოლოდ გაკვალული ბილიკებით ატარეთ. მას დიდად არ აინტერესებს პატარა მგალობელი ჩიტები, მაგრამ ხოხობს ან სხვა სანადირო ფრინველს, შეუძლია გარკვეულ მანძილზე გამოუდგეს. უფრო საშიშია წყლის ფრინველი _ ძაღლი შეიძლება მას მიჰყვეს და წყალში ჩახტეს, იქ კი ძლიერი დინება დახვდეს. ზოგადად, ძაღლები შესანიშნავად ცურავენ და ნაპირზე უვნებლად გამოსვლას ახერხებენ. ასეთ დროს ძაღლს ყოველთვის თქვენკენ მოუხმეთ, რათა მიხვდეს, რა მიმართულებით გამოცუროს, რათა ორიენტაცია არ დაკარგოს.
ქვეწარმავლის სახეობის დადგენა
თუ თქვენს საცხოვრებელ რეგიონში შხამიანი ქვეწარმავლები, განსაკუთრებით კი გველები, ბინადრობენ, გაეცანით მათ სახეობებს, რათა ადვილად შეძლოთ შხამის დადგენა. თქვენი ძაღლი თუ რომელიმე მათგანს შეუტევს და ისიც უკბენს, ამისთვის მზად იქნებით.
უპრიანი იქნება მობილური ტელეფონის ფოტოკამერით გველს სურათი გადაუღოთ იმისთვის, რომ ძაღლს სწორად და ეფექტურად უმკურნალონ.
ცნობისმოყვარეობის პოზა
როდესაც ძაღლი გველს აკვირდება, კუდი აპრეხილი აქვს, ყურები კი წინ ჩამოყრილი.
რჩევა
გარკვეულ რეგიონებში ძაღლის აცრა აუცილებელია, რადგან გარეულმა ცხოველებმა შეიძლება ცოფი გადასდონ.