ღამის შფოთვა
ლეკვებს ახასიათებთ შფოთვა, როდესაც ოჯახს დააშორებენ. თავიდან, როცა მის გვერდით ხართ, ის ნაკლებად ან საერთოდ არ გამოავლენს დათრგუნვის ნიშნებს. მაგრამ როდესაც ლეკვს მარტო დატოვებთ და დასაძინებლად წახვალთ, სიტუაცია შეიძლება შეიცვალოს. ის მოჰყვება გაუთავებელ წკმუტუნს, რითაც შეეცდება მიგახვედროთ, რომ თავს მარტო გრძნობს და ეძებს თანაგრძნობას. ამგვარი სიტუაცია ერთადერთია, სადაც ყველაზე გონივრული იქნება, თუ ყურადღებას არ მიაქცევთ ლეკვს.
მანქანით მგზავრობის შეჩვევა
მანქანით მგზავრობას შეუჩვეველმა ლეკვმა შეიძლება ნერვიულობა დაიწყოს ან გულისრევამ შეაწუხოს. ასე რომ არ მოხდეს, დასაწყისისთვის ცოტა ხნით რამდენჯერმე გაასეირნეთ ავტომანქანით.
ბებერი ძაღლების შფოთვა
ბებერი ძაღლების შფოთვა ხშირად დაკავშირებულია წარსულის ცუდ მოგონებებთან. სასტიკი მოპყრობისგან გადარჩენილ ძაღლებს დიდი გულისხმიერებით მოპყრობა სჭირდებათ. ეს ძაღლი აშკარად დაბნეულია, ერთი ყური უკან აქვს გადაწეული და შეშფოთებული თვალებით იყურება.
ვეტერინართან ვიზიტი
ლეკვები ხშირად ნერვიულობენ, მაშინაც კი, როცა ამის აშკარა მიზეზი არ არსებობს. ასეთი ტიპის ქცევას ყველაზე ადრე, სავარაუდოდ, მაშინ წააწყდებით, როდესაც პირველად წაიყვანთ ვეტერინართან. მგზავრობამ, ხმაურმა და სხვა ძაღლების სუნმა, უცნობ ადამიანთან შეხვედრამ შეიძლება ლეკვი დააფრთხოს და დათრგუნოს. ამ შემთხვევაში მნიშვნელოვანია, დარწმუნდეს, რომ ცუდი არაფერი ემუქრება. ვეტერინარების უმრავლესობას დრო სჭირდება, რომ ლეკვი დაამშვიდოს, რათა შემდგომში მასთან მისვლის აღარ შეეშინდეს.
ტიპური მაჩვენებლები
შფოთვის ნიშნები, მიუხედავად მიზეზისა, ჩვეულებრივ, ერთნაირია. ძაღლი, როგორც წესი, ჩამოჯდება, ყურებს უკან გადასწევს და ჩამოყრის, კუდს კი უკანა ფეხებს შორის ამოიდებს; ამასობაში დაჟინებით აკვირდება თავისი შეშფოთების მიზეზს. შეიძლება აღქმული საფრთხისგან უკანმოუხედავად გაქცევაც სცადოს. თუ თავს მომწყვდეულად ან მიტოვებულად იგრძნობს, ალბათ წკმუტუნსაც დაიწყებს.
უწყინარი ლეკვი
ამ ლეკვმა ტანი და თავი დაბლა დასწია, რითაც ირგვლივ მყოფებს აჩვენებს, რომ საფრთხეს არავისთვის წარმოადგენს.
მეგობარი თუ მტერი?
ამ ნაჯვარ ლეკვს აშკარად ანერვიულებს კატის სიახლოვე. როდესაც შინ გაზრდილი ლეკვი ეზოში პირველად გადაეყრება კატას, იბნევა და ვერ ხვდება – ეს ცხოველი საშიშია თუ არა.
თვალებით ურთიერთობა
ეს ლეკვი დაბნეული უყურებს მეორე ძაღლს, შემდეგ შეიძლება თვალები დახაროს კიდეც, რათა მიშტერება მისგან მუქარად არ იქნეს აღქმული.
ფრთხილად!
გახსოვდეთ, სასტიკი მოპყრობისგან გადარჩენილ ძაღლებს წარსული შეიძლება უცებ რაღაცამ შეახსენოს, რაც მათი ძლიერი ნერვიულობის მიზეზი ხდება.