სასურველის მიღება
ძაღლსა და პატრონს შორის მნიშვნელოვანია თვალებით ურთიერთობა. თქვენი ყურადღების მოსაზიდად ძაღლმა, თუ ზიხართ, შეიძლება მუხლზე ნაზად დაგადოთ თავი ან თათი, თან თვალმოუშორებლად გიყუროთ. მისი აზრით, ამან უნდა იმოქმედოს თქვენზე და გაიძულოთ, გამოიჩინოთ მისდამი თანაგრძნობა – როგორც კი მოძრაობას დაიწყებთ, ისიც აღელვებული დაიწყებს სირბილს სეირნობის
ზურგზე წოლა
ზურგზე წოლის შემდეგ ფეხზე რომ წამოდგეს და მყარად დადგეს, ძაღლი ჯერ გვერდზე უნდა გადაბრუნდეს და თავდაცვითი პოზა დაიბრუნოს. ზურგზე დაწოლილი ძაღლი დაუცველია, განსაკუთრებით იმიტომ, რომ ყელის არე გაშიშვლებული აქვს. ძაღლები შეიძლება ზურგზე ამობრუნდნენ ძილის დროს, როდესაც თბილად და მოხერხებულად არიან. ასეთი პოზა მათ გაგრილების საშუალებას აძლევს, რადგან შიშვლდება ტანის ბალნით ნაკლებად დაფარული ქვედა მხარე, ამიტომ სითბოც ადვილად გაიცემა.
მისალმება
ზურგზე დაწოლილმა ძაღლმა, როცა მიუახლოვდებით, მისალმების ნიშნად შეიძლება წინა თათები ასწიოს.
თამაშის მოლოდინში
ეს ძაღლი რაღაცას აკვირდება, უსმენს და თანაც საკმაოდ ფხიზლობს – მას ძილზე მეტად თამაში უნდა. თუ მკერდზე ხელით მოეფერებით, მაშინვე ზამბარასავით წამოხტება.
საუკეთესო მეგობრები
თუ ორი ძაღლი ძალზე მშვიდად ხვდება ერთმანეთს, ეს იმის ნიშანია, რომ ერთმანეთს კარგად იცნობენ. ძაღლები, რომლებიც რაღაც დროის განმავლობაში ცალ-ცალკე იყვნენ, ხელახლა შეხვედრისას, როგორც წესი, ერთმანეთის სხეულის სხვადასხვა ნაწილის დაყნოსვას იწყებენ.
დომინანტის მზერა
კინოლოგიური ტერმინოლოგიით "ჯიქური მზერა" დომინანტი ძაღლის ძირითადი მახასიათებელია; დამორჩილებული ინდივიდი თვალებს პირველი დახრის.
გორაობის მიზეზები
ძაღლის გორაობა ზურგზე რამდენიმე მიზეზით აიხსნება. მიწაზე გაგორებით მიანიშნებს, რომ თამაში უნდა. შემდეგ შეიძლება წინა ფეხები გკრათ, მერე შეგახტეთ, რადგან ჰგონია, რომ ამით გულს მოგილბობთ, მერე კი გაიქცეს და სათამაშოთი დაბრუნდეს. თუ ძაღლი დივანზე თქვენ გვერდით წამოწვა, ესე იგი, ყურადღებას ითხოვს და მკერდსა და მუცელზე მოფერებას. ის, როგორც წესი, ზურგზე ამობრუნდება მაშინ, როდესაც მოკუნტული წოლის შედეგად დასცხება. მაგრამ ცოტა ხანში გვერდზე გადაბრუნდება, რადგან დიდხანს ზურგზე წოლა არც ისე მოსახერხებელი პოზაა. ძაღლები, როდესაც ერთმანეთს ეთამაშებიან, თავდავიწყებით გორაობენ და ფეხებით ეჩხუბებიან ერთმანეთს. ეს იმის ნიშანია, რომ ერთმანეთს კარგად იცნობენ, რადგან აგრესიული შეტაკების დროს ორივე ძაღლი ფეხზე მყარად დგომას ცდილობს.
გავარჯიშება
გარეთ, ეზოში, ძაღლი ზურგზე გორაობს, რათა გაიჭიმოს. ამით ჰგავს ადამიანებს, რომლებიც ხერხემლის ვარჯიშებს აკეთებენ. ძაღლის ზურგის ძალა ამ შემთხვევაში საკმაოდ თვალსაჩინოა. მისი აქეთ-იქით მოძრაობით ცხოველს მიწაზე გარკვეულ მანძილზე გადაადგილება შეუძლია. გახსოვდეთ, რომ ძაღლი გორაობს სხვადასხვა ცხოველის ნაკელშიც, დაწყებული მელიებიდან და დამთავრებული მსხვილფეხა რქოსნებით, რათა მათსავით მძაფრი სუნი ჰქონდეს.
ფრთხილად!
ორი ძაღლის შეხვედრის დროს თვალი ადევნეთ ნიშნებს, რომელთა მიხედვითაც დაადგენთ, როგორი დამოკიდებულება აქვთ ერთმანეთთან.
მასალა მომზადებულია "პალიტრა L"-ის მიერ გამოცემული წიგნის "რაზე მეტყველებს ძაღლის ქცევა" მიხედვით