ახალ გარემოში დამკვიდრება
თქვენ შეგიძლიათ, დაეხმაროთ ლეკვს ახალ გარემოში დასამკვიდრებლად და დაიმსახუროთ მისი ნდობა, თუ ალერსიანად და მშვიდად მოუხმობთ. ლეკვი ბუნებით მიმნდობია და თქვენი ხმის ტონი დაამშვიდებს. თუმცა ზომიერებაც უნდა გამოიჩინოთ და თავნებობას არ მიაჩვიოთ – წინააღმდეგ შემთხვევაში, ლეკვი არად ჩააგდებს თქვენს ბრძანებებს და შეიძლება თავი ხიფათში ჩაიგდოს. ამიტომაც არის აუცილებელი ელემენტარული წვრთნა თავიდანვე
ფრთხილი სიმშვიდე
ეს ლეკვი მშვიდიც ჩანს და ფრთხილიც _ წამოწეული ყურები და ოდნავ დაშვებული კუდი მიუთითებს, რომ ის თავის თავში მთლად დარწმუნებული არ არის.
თანაცხოვრება
თუ გყავთ სხვა ცხოველები, ახალმა ლეკვმა მათთან საერთო ენა უნდა გამონახოს. ამ ლეკვმა შეიძლება სამაგიერო მიიღოს –კნუტმა დაკაწროს, შემდეგში კი ასეთ შეცდომას აღარ გაიმეორებს.
გამოხმაურება
სახელს, რომელიც თქვენს საყვარელ ცხოველს შეურჩიეთ, მნიშვნელობა მხოლოდ თქვენთვის აქვს. თუ ლეკვს ყოველთვის ამ სახელით მიმართავთ, ის მალე ისწავლის ბგერების ამოცნობას. გაუგებრობის თავიდან ასაცილებლად არ მიმართოთ ლეკვს იმ სახელით, რომელიც უკვე ჰქვია სახლის რომელიმე ცხოველს. დღის განმავლობაში რეგულარულად მოუხმეთ ლეკვს, როდესაც თქვენთან ერთად გყავთ ოთახში, და მაშინაც, როცა სახლში სხვა ადგილას ხართ. ასევე მოიქეცით ეზოში _ ლეკვები უკეთ სწავლობენ გამეორებით. უნდა მიაღწიოთ იმას, რომ ლეკვი თითქმის ინსტინქტურად მოდიოდეს თქვენს ძახილზე. იცოდეთ, როდესაც ძაღლს წვრთნით, ჯიშის თავისებურებათა გათვალისწინებით, შეიძლება მოგიხდეთ მეთოდების შეცვლა. წვრთნის დროს ყველა ძაღლისთვის, განურჩევლად, ძალზე მნიშვნელოვანია თანამიმდევრობა და გამეორება.
სიჯიუტის გამოვლენა
კავალერ კინგ ჩარლზ სპანიელის ამ ლეკვს არ მოსწონს საბლით სიარული _ უკან იწევს პატრონისგან, რომელსაც მისი სასეირნოდ გაყვანა აქვს განზრახული.
ქედმაღლობა
ინგლისური ბულტერიერები (იხ. სურათზე) შეიძლება ძალზე ქედმაღლობდნენ სხვა ძაღლებთან შეხვედრისას, რაც ზოგჯერ დაპირისპირების მიზეზი ხდება.
თავნებობა წვრთნის დროს
წვრთნის პროცესში შეიძლება გამოვლინდეს არასასურველი რამ – თავნებობა, როდესაც ახალგაზრდა ძაღლი ჯიუტად არ აპირებს თანამშრომლობას. ნუ გაუბრაზდებით, როდესაც ლეკვი მითითების მიხედვით არ იქცევა. მან შეიძლება ვერ გაარკვია, რა უბრძანეს. ამისთვის ნუ დააბნევთ – უბრალოდ გაიმეორეთ წვრთნის პროცედურა. დიდხანს არ გააგრძელოთ წვრთნა – ეს ლეკვის წარმატებისა და თავდაჯერებულობის მიღწევის ერთ-ერთი წინა პირობაა. გაცილებით უკეთესი შედეგი მოაქვს მოკლე, ხშირ სეანსებს, ვიდრე მარათონულ წვრთნას. გაითვალისწინეთ ის, რაც ლეკვმა უკვე აითვისა, და განაგრძეთ მისთვის ელემენტარული მითითებების სწავლება.
თავნება ჯიშები
ზოგიერთ ჯიშს უფრო თავნება ხასიათი აქვს. ასეთი ძაღლის ტიპური მაგალითია ინგლისური ბულტერიერი (მარცხნივ). მისი წვრთნა დაკავშირებულია სირთულეებთან, რადგან შეიძლება გამოავლინოს ძლიერი და დამოუკიდებელი ხასიათი. ბევრ მოდარაჯე ძაღლს, მაგალითად მასტიფის ჯიშის ინდივიდებს, ძალზე შეუპოვარი ხასიათი აქვთ, რაც გასათვალისწინებელია წვრთნის დროს.
ფრთხილად!
ლეკვს მრავალი საფრთხე ემუქრება, ასე რომ, თვალყური ადევნეთ, განსაკუთრებით, როდესაც სასეირნოდ მის გაყვანას დაიწყებთ.
მასალა მომზადებულია "პალიტრა L"-ის მიერ გამოცემული წიგნის "რაზე მეტყველებს ძაღლის ქცევა" მიხედვით