ანუბისი
ძველეგვიპტური ძაღლისთავიანი ანუბისი მიცვალებულებისა და მუმიების ღმერთი იყო. მისი გამოსახულებები ნაპოვნია პირამიდების შიგნითაც.
პომპეური მოდარაჯე ძაღლი
პომპეიში, პაკიუს პროკულუსის სახლის მოზაიკაზე გამოსახულია დაბმული მოდარაჯე ძაღლი. მსგავსი გამოსახულება ნაპოვნია რამდენიმე ნასახლარშიც. ჩანს, პატრონი ამით მომსვლელს აფრთხილებდა, რომ სახლს ძაღლი იცავდა. ზოგ მოზაიკაზე გვხვდება ასეთი წარწერაც: CAVE CANE – უფრთხილდი ძაღლს! როცა ვულკან ვეზუვის ამოფრქვევის შედეგად პომპეი განადგურდა, დაბმულმა მოდარაჯე ძაღლებმა თავს გაქცევით ვერ უშველეს. გაქვავებული ლავის ყალიბში ნათლად ჩანს მათი ჩაკირული საყელურები.
რომაული მონადირე ძაღლები (ზემოთ)
II-III საუკუნეების ამ რომაულ მოზაიკაზე გამოსახულია ნადირობის სცენა, სადაც მხედრებს ეხმარებიან მწევრები, რომლებიც, სავარაუდოდ, ბერძნებისგან, ანდა – კელტებისგან წამოიყვანეს. ანტიკური ხანის ისეთი მწერლები, როგორიც არიან ოვიდიუსი და არიანე, ამ მწევრებს "კელტურ ჯიშად" მოიხსენიებენ. მომცრო ნადირის დასაჭერად პატარა ძაღლები გამოიყენებოდა, რომელთა დამორჩილება მწევრებთან შედარებით უფრო იოლი იყო. ისინი საბოლო-ოდ პოინტერებად ჩამოყალიბდნენ. ძაღლებით ნადირობა გართობის ერთ-ერთ სახეს წარმოადგენდა.
ჩინური მასტიფი
ჩინეთში ჰანის დინასტიის (ახ. წ. 25–220) პერიოდში, სავარაუდოდ, ჰყავდათ ორი ჯიშის სანადირო ძაღლები: ფეხმარდი მწევრები, რომლებიც ირმების მარეკებად გამოიყენებოდნენ და ჩასკვნილი მასტიფის სახესხვაობა. ეს უკანასკნელი გამოიყვანეს "სააკლდამე" ძაღლებად, რომლებსაც გარდაცვლილთა ნეშტები და მათი სულები უნდა დაეცვათ. ეს მოდარაჯე ძაღლები ძლიერი აგებულებისანი არიან, აქვთ კარგად განვითარებული კბილები და მუდამ დახვეული და ზურგზე დადებული, ე.წ. "მოპსის ტიპის" კუდი.
კარგი მწყემსები
ძაღლებმა, როგორც საქონლის მწყემსებმა და მცველებმა, საუკუნეების მანძილზე მსოფლიოს მრავალ რეგიონში, განსაკუთრებით ნისლიანი შოტლანდიის მინდვრებზე, მნიშვნელოვანი როლი ითამაშეს.
ძაღლები და ნადირობა
ძველთაგანვე მონადირე ძაღლები ტახის დასაჭერად გამოიყენებოდა, რასაც XV საუკუნის ფრანგული ნახატი "ტახზე ნადირობაც" ნათლად ადასტურებს. ტახზე დაგეშილი ძაღლები იყოფიან ორ კატეგორიად: მყეფავებად და დამჭერებად. მყეფავი ძაღლები ტახს გამოდევნიან, ერთ ადგილზე მოიმწყვდევენ და გაცხარებული ყეფით ატყობინებენ პატრონს მათ ადგილსამყოფელს. დამჭერი ძაღლები კი ისევე, როგორც ამ ნახატზეა გამოსახული, თავს ესხმიან მსხვერპლს, ყურებში ჩააფრინდებიან და მონადირის მოსვლამდე განძრევის საშუალებას არ ძლევენ.
ესპანური სანადირო ძაღლები
ფრანსისკო დე გოიას 1775 წლით დათარიღებულ ნახატზე გამოსახულია მუშკეტით შეიარაღებული მონადირე. მისი მწევრები ნადირის გამოსარეკავად ან დასაჭერად არიან დაგეშილები.